Американскиот претседател Доналд Трамп денеска изјави дека наредил да се воведат царини, визни ограничувања и други одмазднички мерки против Колумбија, откако нејзината влада одби да прими два авиона со мигранти. Трамп рече дека мерките се неопходни, бидејќи одлуката на колумбискиот претседател Густаво Петро ја „загрози“ националната безбедност во САД.

„Овие мерки се само почеток“, објави Трамп на својата платформа за социјалните медиуми Трут соушал. „Нема да дозволиме колумбиската влада да ги прекрши своите законски обврски во однос на прифаќањето и враќањето на криминалците што ги истераа во САД“.

Претходно денеска, Петро рече дека неговата влада нема да прифаќа летови со мигранти депортирани од САД додека администрацијата на Трамп не создаде протокол што ги третира „достоинствено“. Петро ја даде оваа изјава во две објави на X, од кои едната вклучуваше видео со вести за мигранти депортирани во Бразил како одат по асфалтот со пранги на рацете и нозете.

„Еден мигрант не е криминалец и мора да се третира со достоинство како што заслужува едно човечко суштество“, рече Петро. „Затоа ги вратив американските воени авиони што превезуваа колумбиски мигранти“.

Колумбија прифати 475 летови за депортација од САД од 2020 до 2024, петта земја зад Гватемала, Хондурас, Мексико и Ел Салвадор, според „Сведици на граница“, група за застапување која ги следи податоците за летовите. Колумбија прифати 124 летови за депортација во 2024. Минатата година, Колумбија и други земји почнаа да прифаќаат летови за депортација од Панама финансирани од САД. Петро, ​​поранешен левичарски герилец, додаде дека неговата земја ќе ги прими Колумбијците во „цивилни авиони“ и „без третман како криминалци“.