Бугарските власти се обвинети дека игнорирале повици за итна ситуација и ги попречувале напорите за спас на тројца египетски тинејџери, кои потоа починале на ниски температури близу бугарско-турската граница во декември.

Доказите собрани од две хуманитарни организации содржат фотографии, сведоштва и геолокации, кои наводно покажуваат дека властите не ги спасиле момчињата, кои барале помош на студот и биле изгубени во шумите кај Бургас. Организациите „No Name Kitchen“ и „Collettivo Rotte Balcaniche“ велат дека биле известени за повиците утрото на 27 декември 2024. Повиците се однесувале на тројца тинејџери кои се во смртна опасност.

Активистите сами се јавиле на бројот за итни случаи 112 и се обиделе да стигнат до момчињата. Бугарската гранична полиција наводно ги попречувала нивните спасувачки напори и трите момчиња на возраст од 15, 16 и 17 години подоцна биле пронајдени мртви.

„Околу телото на едно од момчињата имаше отпечатоци од чизми и кучешки шепи, што покажува дека граничната полиција го пронашла, дали жив или мртов, но избрала да го остави таму на студот“, стои во извештајот на двете организации.

Бугарското министерство за внатрешни работи ги отфрли наводите и рече дека неговите гранични сили реагирале навремено на извештаите за млади луѓе во неволја, испраќајќи патроли веднаш, но дека телата биле пронајдени на различни локации од првично дадените.

„Бараме независна, формална истрага за системско насилство и небрежност од бугарските власти и понижувачко постапување со луѓето во движење“, кажаа двете организации.

Бугарската граница со Турција често ја преминуваат луѓе кои се надеваат на азил во Европа и во последниве години имаше добро документирани прекршувања на човекови права, вклучително и незаконски враќања на баратели на азил во Турција.