Специјалното обвинителство за борба против организиран криминал и корупција денеска го уапси градоначалникот на Тирана, Ерион Велиај. Тој попладнево беше спроведен во притвор, а домашен притвор е одреден за неговата сопруга, која моментално е надвор од Албанија. Приведени се уште петмина бизнисмени, кои наводно добивале сомнителни тендери од градот.

Кон крајот на декември, Специјалното обвинителство објави дека води истрага против Велиај и неговото семејство за корупција, перење пари и криење имот.

„Утврдено е дека има конкретни докази дека членовите на блиското семејство и други роднини на градоначалникот на Тирана добивале незаконски бенефиции преку неколку фирми и поединци кои имаат директни интереси во општина Тирана“, кажа обвинителството.

Велиај првпат бил испрашан во полиција на 28 декември, кога рекол дека е наместен од личност која не постои.