Доналд Трамп изјави дека ќе бара од Украина компензација за досегашната американска помош, при што предложи тргување со нејзините природни ресурси, како ретки минерали.

„Ќе ги вратиме сите тие пари. Им реков на Украинците дека сакам ретки минерали во вредност од 500 милијарди долари. Тие во суштина се согласија со тоа, па барем нема да испаднеме глупи. Им реков дека мора да добиеме нешто. Не можеме да продолжиме да им даваме пари“, кажа Трамп.

Украина располага со резерви на повеќе од 20 ретки земјени минерали, како литиум, ураниум и титаниум, чија вредност се проценува на неколку трилиони долари. Таму исто така има наоѓалишта на јаглен, нафта и гас. Сепак, нејасно е колку од овие резерви ѝ се достапни на Украина зашто дел од земјата е окупиран од Русија.

„Американците помагаат најмногу, па заслужуваат и да заработат најмногу. Би сакал да разговарам за ова со претседателот Трамп“, кажа Володимир Зеленски, кој претходно ја вклучи експлоатацијата на украинските природни ресурси во својот „победнички план“.

Украинскиот лидер оваа недела ќе се сретне со американскиот потпретседател Џеј Ди Венс, што треба да се случи в петок на маргините на Минхенската безбедносна конференција. На 20 февруари, во Украина за првпат треба да пристигне Кит Келог, специјалниот претставник на Трамп за Украина, кој доби задача да состави предлог за крај на војната.