Најмалку две лица загина, а три се повредени во голем напад со дронови врз Москва и тамошниот регион, изјавија властите. Регионалниот гувернер Андреј Воробјев кажа дека жртвите се од градовите Видноје и Домодедово близу Москва и дека се оштетени седум стана во една станбена зграда.

Градоначалникот на Москва Сергеј Собјанин изјави дека се соборени 91 дрон кои биле упатени кон градот. Железничкиот сообраќај во еден округ е во прекин, а воведени се и ограничувања на аеродромите во Москва. Воробјев објави фотографии од еден од оштетените станови и од изгорени автомобили на паркинг во Московскиот регион.

Ова е еден од најголемите напади врз Москва од почетокот на руската инвазија врз Украина и се случи во пресрет на разговорите САД-Украина во Саудиска Арабија. Руското министерство за одбрана извести дека ноќеска биле соборени или пресретнати вкупно 337 украински дронови над Москва и девет други региони.