Доналд Трамп изјави дека многу елементи од мировен договор за Украина се веќе договорени со Владимир Путин во пресрет на нивниот телефонски разговор денеска. Тој сепак призна дека останува уште многу да се работи за да се постигне примирје.

„Секоја недела умираат по 2.500 војници на двете страни и тоа мора да запре веднаш. Многу очекувам од телефонскиот разговор со Владимир Путин. Мислам дека ќе успееме да постигнеме примирје, мировен договор и мир“, кажа Трамп.

Во исто време, Володимир Зеленски го обвини Путин дека ја продолжува војната.

„Овој предлог можеше да се спроведе пред многу време. Секој ден во војна чини човечки животи“, кажа Зеленски ноќеска.

Во владата на Трамп имаше недоследности околу тоа колку се напреднати разговорите за прекин на огнот. Државниот секретар Марко Рубио рече дека најголемиот дел од разговорите бил како би изгледал преговарачкиот процес, а не специфичните услови. Специјалниот претставник на Трамп, Стив Виткоф, кој се состана со Путин во четвртокот во Москва, исто така имаше поодмерен тон. Во меѓувреме, Велика Британија и Франција го повикаа Путин да докаже дека сака мировен договор со Украина.

Белата куќа кажа дека мирот во Украина никогаш не бил поблиску.

„Трамп е решен да обезбеди мировен договор“, рече портпаролката на Белата куќа, Керолајн Ливит, додавајќи дека важен дел од разговорите Трамп-Путин ќе биде нуклеарната централа Запорожје.

Иако Путин кажа дека ја поддржува идејата за 30-дневно примирје, тој исто така нагласи дека Русија има свои услови за крај на војната.