„Вратите на градинката ‘Планински цвет’ во Вевчани се сменети, како што најави градоначалникот Спасе Кочовски, но старите се фрлени во вевчанската природа“, обвинува здружението „Мое Вевчани“, кое на својата фејсбук страна објави фотографии од фрлените врати.. Промената на внатрешната столарија на зградата е дел од проектот кој се реализира преку Центарот за развој на Југозападниот Плански Регион (ЦРЈПР).
„Ние како Општина само аплицираме на повикот. Тендерот го објавува Југозападен Плански Регион кој избира изведувач“, вели градоначалникот на Вевчани, Спасе Кочовски.
Кочовски не гледа вина на Општината оти, како што вели, обврска вратите да ги однесе на депонија има фирмата изведувач, а не Општината ниту пак градинката.
„Градежниот шут требаше да го крене инвеститорот, Југозападниот Плански Регион. Кај се фрлени, што се фрлени, ние не знаеме. Обврска на изведувачот е да ги однесе на депонија предвидена за ваков тип на отпад надвор од Вевчани, оти ние немаме депонија за градежен шут“, вели Кочовски за САКАМДАКАЖАМ.МК.
Според него, од сликите не може да се заклучи дека станува збор за природа во Вевчани.
„Кај се сликани не знам. Може да се сликани на депонија. Не можам да тврдам дека се сликани во Вевчани. Се слушнав со изведувачот и ми кажаа дека се однесени вратите на депонија“, кажува Кочовски.
Градежните активности во градинката „Планински цвет“ се реализираат со средства на ЦРЈПР. Инсталацијата на топлотните пумпи е во вредност од два и пол милиони денари (околу 40.000 евра), додека замената на внатрешната столарија, плочките и замената на ламперијата чини 900.000 денари (околу 14.500 евра).
С. ВРЕНЦОВСКА
