Дваесетгодишна девојка, која била меѓу потешко повредените во пожарот во кочанската дискотека „Пулс“ на 16 март и била два пати реанимирана, е веќе на нозе и во стабилна состојба на Клиниката за пластична хирургија во Скопје, рече денеска министерот за здравство Арбен Таравари. Во пожарот загинаа 61 лице, меѓу кои 6 деца, а 193 беа повредени од кои 25 деца.
Таравари кажа дека девојката била еднаш реанимирана на Клиничкиот центар „Мајка Тереза“ во Скопје, а вториот пат при транспортот во странство.
„Сите пациенти кои дојдоа тоа утро беа тешки, изгорениците беа во поголем степен. Таа е реанимирана во Ургениот центар, па пренесена во КАРИЛ. Таа една од првите која беше пренесена во друга установа надвор од земјата. Вратена е во стабилна состојба. Утре се планира мал хируршки зафат за третирање на раните на кои сѐ уште им треба доста нега. Ги очекуваме сите други параметри, бидејќи беше малку покритична и некои компликации настанале за време на лекувањето, но рековме дека е стабилна и се движи. Кога ќе бидат сите анализи во ред би ја пуштиле на домашно лекување“, рече директорката на Клиниката, д-р Јасмина Ѓоргиевска-Павловска.
Таравари рече дека во скопските болници се лекуваат 9 пациенти, во странство 48, од кои еден денес ќе се врати од Унгарија. Од пациентите во странство, двајца се во критична состојба.
Вкупно 45 физички лица и 3 правни лица се осомничени за пожарот во дивата дискотека во Кочани и се товарат за Тешки дела против општата сигурност. Истрага се води и против седум полициски службеници од Штип и Кочани и тие се во притвор.
Б. НЕСТОРОСКА
