Приведен е сопственикот на отпадот за старо железо во Визбегово каде утрово изби голем пожар, соопшти Министерството за внатрешни работи (МВР). Во пожарот едно лице е повредено и однесено в болница за укажување лекарска помош.
„Во 9.16 часот во СВР Скопје е пријавено дека на отпад за старо железо има пожар односно дека горат хаварисани возила, на кои имало монтирано плински уреди и се слушаат детонации од истите. Досега нема зафатено приватен имот, куќи. Се преземаат мерки за гасење на огнот и расчистување на случајот“, велат од Министерството за внатрешни работи.
Јавен обвинител ќе издаде наредби и насоки за целосно испитување на причините за настанување на пожарот во Визбегово и евентуалната предизвикана опасност врз животот и телото на луѓето, имотот или врз животната средина, соопшти Основното јавно обвинителство Скопје.
Во гасењето на пожарот покрај скопската Пожарна вклучен е и „ер тракторот“ на Дирекцијата за заштита и спасување (ДЗС).
Од Центарот за управување со кризи (ЦУК) кажаа дека пожар се шири и има ризик за проширување кон околните површини, а опасно е бидејќи во близина се наоѓаат станбени куќи. д ЦУК велат дека му е укажано на градоначалникот на Шуто Оризари Курто Дудуш дека ако се процени ќе има потреба за евакуација на населението кое се наоѓа во тој реон.
