За уште пет дена е продолжен рокот за пријавување на огласот на Владата за 400 привремени пожарникари. Како што кажа директорот на Дирекцијата за заштита и спасување (ДЗС) Стојанче Ангелов, освен во Скопје во другите градови има голем интерес.

„Во Скопје имаме најслаб интерес, а во главниот град има најмногу жители. Јас апелирам граѓаните кои се здрави и физички спремни да се пријават на овој оглас. Знам дека сумата од 24.000 денари е мала, но ова е само почетна точка, најдобрите од нив ќе бидат вработени во Пожарните бригади, а во Скопје во новата специјална единица за заштита и спасување“, рече Ангелов.

Тој кажа дека се појавил лимитирачки фактор при пријавувањето кандидатите затоа што треба да се регистрирани во Агенцијата за вработување како активни баратели на работа.

„Дел од лицата кои сакаа да се пријават не се пријавени во Агенцијата за вработување. Затоа решивме да го продолжиме рокот за да имаат време да се регистрираат“, додаде Ангелов.

А. АНТЕВСКА