Еден месец полн контејнер од ѓубре стои на улицата Даме Груев спроти поранешно „Беко“ во центарот на Скопје. Контејнерот е скршен па возилата на ЈП „Комунална хигиена“ не можат да го подигнат и оставен е преполн со ѓубре.

Вработените во околните дуќани велат дека центарот на градот смрди од ѓубрето кое е скапано, но никој не наоѓа начин како да го собере.

„На овие горештини во строг центар на градот стои преполн контејнер. Не можеме да излеземе од дуќаните од што смрди. Другите контејнерите ќе ги испразнат, но овој не го чепкаат. Како е можно да нема начин да се собере ѓубрето“, велат граѓани кои испратија фотографии до нашата редакција.

Проблемот во Скопје со нередовно празнење на контејнерите трае веќе неколку години, па градот е затрупан во ѓубре.

А. АНТЕВСКА