Стружани бараат возобновување на храмот „Пресвета Богородица“ кај параклисот „Воведение Богородично“ во близина на Женската плажа. Денеска, на литургија за празникот Успение на Пресвета Богородица или Голема Богородица, верниците уште еднаш побараа изградба на црквата која некогаш тука постоела.

„Како деца сме доаѓале, сме палеле свеќа, имаше икона. Нашите дедовци, прадедовци кажуваа дека тука била црквата, а и сега се пронајдени темели од црквата. Кога ќе дојдевме тука се помолувавме за добро пливање, за резултати. Ова е свето место, пронајдени се артефакти и жалосно е ова место да остане така“, вели 83-годишниот стружанец Стефан Лазарески.

Дозвола за градба на храмот се чека 15 години иако земјиштето е во сопственост на црквата. Постапката секогаш заглавувала во административни постапки во локалната власт, вели Христијан Ковачески, секретар на соборниот храм „Свети Ѓорѓи“ Струга.

„Празникот го прославуваме под отворено небо, со барање да се изгради храм оти тоа е потреба и на граѓаните и на верниците и на црквата. Овде пред многу години постоела црква. Од 2010 година вратен е имотот на црквата со денационализација и нормално на црковно место треба да има храм. За секоја иницијатива имаат различен изговор од локалната администрација. Во принцип, немаме некој слух за потребата“, вели Ковачески.

Кон крајот на 19 век, историчарите патеписци пишувале дека овде имало храм, вели отец Александар Димоски според кого градењето не е примарна цел, но е реална потреба.

„Откако постои Македонија во некаков државен облик, освен храмот на гробиштата, во Струга не е изграден ниту еден друг храм“, вели отец Димоски.

С. ВРЕНЦОВСКА