Владата ќе отвори ресурсен центар кој ќе им помога на Општините да изработуваат проекти и да аплицираат за добивање средства за развој на општината. Како што кажа министерот за локална самоуправа Златко Перински, Општините немаат капацитетите за подготовка на проекти преку кои ќе привлекуваат средства во своите општини.

„За да се одговори на овој децениски предизвик со кој се соочуваат општините потребен е систематизиран пристап и поврзување на мерките и активностите. Концептот што оваа Влада го нуди се однесува токму на систематизирана и институционализирана подршка во функција на реформа на локалната самоуправа во форма на ресурсен центар за поддршка на општините, кој што ќе понуди изводливи и одржливи решенија за зајакнување на капацитеите на општините“, рече Перински.

Перински рече дека ресурсниот центар ќе обезбеди подршка која ќе гарантира зголемување на капацитетите на локалната самоуправа што ќе доведе до поквалитетни локални услуги за граѓаните.

„Ќе се обезбеди ростер на експерти коишто на барање на општината би биле на располагање за надминување на предизвиците во испораката на секоја услуга во надлежност на општината. Насоки за надминување на препораките коишто Државниот завод за ревизија (ДЗР) ги детектирал како слабост врз основа на извршените ревизии во општините во изминатиот период“, додаде Перински.