Американската вселенска агенција НАСА им забрани пристап на кинеските државјани со важечки американски визи, спречувајќи ги да работат во тамошните истражувачки центри.

Кинеските граѓани, кои можат да работат во НАСА само како изведувачи или како студенти кои придонесуваат за истражувања, дознале на 5 септември дека го изгубиле целиот пристап кон системите и постројките на НАСА, објави „Блумберг“, повикувајќи се на добро упатени извори. НАСА потоа го потврди ова, велејќи дека „на кинеските државјани ќе им биде ограничено користењето на објектите, материјалите и мрежите на агенцијата за да се обезбеди нивната безбедност“.

Забрзната вселенска програма на Кина го загрижи Вашингтон и ја засили вселенската трка помеѓу двете најголеми светски економии. Кинеските астронаути се веќе исклучени од Меѓународната вселенска станица зашто Вашингтон ѝ забрани на НАСА да споделува податоци со Кина.

На сослушувањето во американскиот Сенат минатата недела, пратениците ја нагласија потребата САД да стигнат на Месечината пред Кина.

„Кина не ги крие своите цели. Ако нашите противници постигнат доминантни вселенски капацитети, тоа би претставувало голем ризик за Америка. Влоговите не можат да бидат поголеми“, рече републиканскиот сенатор Тед Круз