Научниците Сусуму Китагава (Јапонија), Ричард Робсон (Велика Британија) и Омар Јаги (Јордан/САД) се годинашните добитници на Нобеловата награда за хемија. Тие се наградени за нивното откритие на метални органски мрежи.

„Тројцата лауреати создадоа молекуларни конструкции со големи простори низ кои можат да течат гасови и други хемикалии. Овие метално-органски рамки можат да се користат за собирање вода од пустинскиот воздух, заробување јаглероден диоксид, складирање токсични гасови или за катализирање хемиски реакции“, се вели во соопштението на Нобеловиот комитет.

Робсон (88) работел на Универзитетот во Мелбурн, Китагава (74) на Универзитетот во Кјото, а Јаги (60) на Универзитетот на Калифорнија во Беркли. Јаги е роден во Јордан и потекнува од семејство кое избегало од Палестина, а на 15 години се преселил во САД.