Вкупно 165 крвни единици беа собрани во крводарителската акција „По патот на Гиго“, што се реализираше во Струмица во организација на Црвениот крст, во соработка со Службата за трансфузиона медицина. Во спортската сала на основното училиште „Димитар Влахов“ во Струмица се чекаше ред за да се дарува крв во чест на Глигор Новачевски-Гиго, кој 30 години работел во струмичкиот Црвен крст. Акцијата траеше рекордни седум часа. Покрај долгогодишни дарители, во акцијата се вкучија и голем број нови лица, претежно млади, кои за првпат даруваа крв.

„Станува збор за акција во чест на нашиот колега Глигор Новачевски-Гиго, кој цели 30 години беше дел од Црвениот крст и беше столб и симбол на пожртвуваноста и хуманоста во организацијата. Радува фактот што на акцијата се приклучија ученици од трите средни училишта во Струмица, кои за првпат даруваа и даваат сигнал дека хуманоста е присутна и кај младите. Морам да признам дека првпат имаме ваква слика. Повеќе време се чека за дарување отколку што трае дарувањето“, изјави Столе Цветков, секретар при Црвен крст Струмица.

Акцијата „По патот на Гиго“ ќе стане традиционална и од наредната година ќе биде дел од редовниот календар на крводарителски активности на Црвен крст Струмица.

Лани оваа организација иницирала и реализирала 27 крводарителски акции со вкупно 627 крводарувања. Тие биле во соработка со општини, училишта, граѓански организации, фирми и институции од Струмица. Освен акциите иницирани од општинската организација на Црвен крст, во Струмица крводарувања спроведува и Службата за трансфузиона медицина. Во 2024 во Струмица се регистрирани 1.597 крводарувања.

В. ТРАЈКОВ