Во Детското одделение при Општа болница во Охрид повторно е воведена трета смена. Поради недостиг на лекари-педијатри, таму скоро четири години се вршеа само прегледи и се даваше инфузиона терапија, но не и хоспитализација оти немаше дежурства во ноќните часови, па болните деца се носеа во Струга. Сега, за еден месец се направени 500 прегледи, а во текот на септември се хоспитализирани 20 деца.
Одделот за лекување деца ќе се доекипира по враќањето на петмината лекари што се пратени на специјализација, вели директорот на Општата болница, Горан Маркоски.
„Од 1 септември, Одделението почна со работа и за викендите и со дежурства. Ова одделение има добра иднина затоа што имаме пет лекари што се пратени на специјализација“, кажа Маркоски.
Маркоски најави дека се работи на проект за целосно реновирање на Одделението, а изминативе месеци биле извршени одредени реновирања и санации за да се создадат оптимални услови.
Раководителот на Одделението, д-р Македонка Митреска-Наумоска рече дека моментално се ангажирани три лекари-специјалисти по детска медицина.
„Дополнително, за втори смени и дежурства доаѓа и доктор-специјалист педијатар вработена во Здравствен дом Охрид. На Одделението моментално се ангажирани и двајца педијатри со консултантски договор, односно педијатри пензионери“, изјави д-р Митреска-Наумоска.
За хоспитализација во Детското одделение има седум кревети, но во зависност од потребите ќе бидат адаптирани и други соби за хоспитализација, најавија од управата.
Во Општата болница во Охрид има недостиг од 86 лица, претежно медицински персонал. Недостасуваат лекари анестезиолози, уролози, а лекари фалат и во Одделот за трансфузиологија, Одделот за физикална и Кожното одделение.
„Моментално на Одделението за урологија има само еден лекар-специјалист кој е носител на дејноста. Меѓутоа, ангажирани се двајца специјалисти од Скопје, а во преговори сме за ангажман на уште еден. Со нив некако се покрива дефицитот, но трисменско работење на одделние не е можно само со еден специјалист“, вели Маркоски.
Според него, проблемот со недостигот на стручниот медицински кадар ќе биде надминат по враќањето на 35 лекари кои моментално се на специјализација.
С. ВРЕНЦОВСКА
