Американскиот претседател Доналд Трамп предложи Шпанија да биде исфрлена од НАТО кога се сретна со својот фински колега Александер Стуб во Белата куќа.

Средбата, која требаше да биде вовед во купувањето американски бродови за кршење мраз од страна на Финска, доведе до дискусија за НАТО, при што Трамп се обиде повторно да го разгори својот повеќемесечен спор со Шпанија поради несогласувањата околу трошоците за одбрана.

Трамп долго време е во судир со шпанскиот премиер Педро Санчес, што почна кога тој објави дека Шпанија нема да го прифати неговото барање за зголемување на трошоците за одбрана на 5% од бруто домашниот производ.

„Како што знаете, побарав да се плаќаат пет проценти, а не два. И повеќето луѓе мислеа дека тоа нема да се случи, а се случи практично едногласно. Имавме еден што одбиваше. Тоа беше Шпанија, иако добро им оди“, рече Трамп.

Тој притоа сугерираше дека Шпанија треба да биде исклучена од организацијата.

„Знаете што е смешно? Поради многу работи што ги направивме, на нив им оди добро и немаат изговор да не го сторат ова, но тоа е во ред. Можеби треба да ги исфрлиме од НАТО“, додаде Трамп.

За време на состанокот, Стуб и Трамп формално одобрија договор со кој САД ќе продадат 11 мразокршачи на Финска, што ќе чинат околу 6,1 милијарда долари.