Американскиот претседател Доналд Трамп се закани дека од следниот месец ќе воведе дополнителни царини од 100% за увоз на стоки од Кина, обвинувајќи го Пекинг за „многу непријателски“ потези за ограничување на извозот на ретки метали неопходни за американската индустрија. По неговата објава, берзите на Волстрит забележаа остар пад поради стравувањата од нова трговска војна меѓу двете најголеми светски економии.

Односите меѓу Вашингтон и Пекинг се подобрија во текот на летото, кога Трамп се согласи драстично да ги намали царините што ги воведе претходно годинава. Сепак, во петокот доцна вечерта, тој најави дека ќе ги зголеми царините на 100% „над и онака постоечките“, додавајќи дека тоа ќе се случи на 1 ноември „или порано“. Трамп исто така најави дека САД ќе воведат извозни контроли за „секој и секаков критичен софтвер“.

„Никогаш не мислев дека ќе дојде до ова, но можеби, како и за сè, дојде времето. На крајот, иако потенцијално болно, тоа ќе биде многу добра работа за САД“, напиша Трамп на својата социјална мрежа „Трут Соушл“.

Заканата на Трамп предизвика тревога кај инвеститорите. Акциите на технолошкиот гигант „Енвидиа“ беа особено погодени, со пад од речиси 5%.
Кина е најголемиот светски производител на ретки метали, со удел од над 90% во глобалното производство. Овие 17 елементи се клучни за производството на сè, од електрични автомобили до мотори за авиони. Претходно оваа недела, Пекинг значително ги прошири своите извозни контроли врз овие метали.

„Секогаш чувствував дека чекаат во заседа, и сега, како и обично, се покажа дека сум во право! Не смее да се дозволи Кина да го држи светот како заложник“, напиша Трамп.

Тој исто така навести дека планираната средба со кинескиот претседател Си Џинпинг во Јужна Кореја можеби нема да се одржи, велејќи дека „се чини нема причина“ за средба.