Белата куќа го бранеше Доналд Трамп откако тој за една новинарка кажа дека е свиња. Портпаролката на Белата куќа, Керолајн Ливит, изјави дека народот го избрал Трамп поради неговите отвореност и искреност и дека новинарите треба да ја ценат неговата подготвеност да одговара на нивни прашања.

„Тој ги открива лажните вести кога ќе ги види и се фрустрира од новинарите кои шират лажни информации. Но, тој исто така обезбедува невиден пристап до медиумите и одговара на прашања речиси секојдневно“, рече Ливит.

Судирот помеѓу Трамп и известувачката на „Блумберг“ од Белата куќа, Кетрин Луси, се случил во понеделникот во претседателскиот авион, кога таа почнала да му поставува прашања за Џефри Епстајн.

Ливит не прецизираше на какви лажни вести и информации реагирал Трамп кога ја нарекол Луси „свиња“. Кога таа го прашала Трамп зошто се однесувал така како што однесувал ако немало ништо инкриминирачко во досиејата на Епстајн, Трамп ѝ одговорил:

„Тивко. Тивко, свињо“.

Здружението на професионални новинари издаде соопштение во кое ги осуди коментарите на Трамп.
„Овие инциденти не се изолирани, тие се дел од образец на непријателство, честопати насочено кон жените, што ја поткопува суштинската улога на слободниот и независен печат“, се вели во соопштението.