Американскиот претседател Доналд Трамп изјави дека Украина не покажала никаква благодарност за напорите на САД да се стави крај на војната, додека американските, украинските и меѓународните преговарачи се на средба во Швајцарија за да разговараат за „мировниот план“ кој би вклучувал значителни отстапки од Киев кон Москва.

Полскиот премиер Доналд Туск постави прашање за тоа од каде потекнува „мировниот план“ на Трамп, откако американскиот државен секретар Марко Рубио наводно признал дека текстот првично бил подготвен од Москва.

Туск на социјалната мрежа Икс напиша дека европските лидери, заедно со Канада и Јапонија, се подготвени да работат на предлогот од 28 точки. Планот предвидува Украина да ѝ предаде територии на Русија и да направи други големи отстапки, вклучувајќи ограничување на големината на својата армија и откажување од членство во НАТО.

Сепак, Туск рече дека постојат „одредени резерви“ пред да може да започне работата.

„Би било добро со сигурност да знаеме кој е авторот на планот и каде е тој создаден“, додаде Туск.

Документот бил изготвен од Кирил Дмитриев, пратеник на Владимир Путин, заедно со специјалниот претставник на Трамп, Стив Виткоф. Шпекулациите засновани на јазикот користен во планот сугерираат дека тој можеби бил напишан на руски, а подоцна преведен на англиски.

Група американски сенатори изјавија дека Рубио им кажал оти текстот не е американски. Според нив, тоа било руски документ намерно протечен од Москва, кој САД потоа ѝ го пренеле на Украина. Рубио подоцна инсистираше дека САД се „автори“ на предлогот, со „придонес“ од Русија и Украина.

Среде контрадикторни изјави и реакции од некои републикански сенатори, Трамп се повлече од своето претходно барање украинскиот претседател Володимир Зеленски да го потпише договорот до овој четврток. Говорејќи во Вашингтон, американскиот претседател рече дека тоа „не е мојата конечна понуда“, отворајќи ја вратата за значителни промени.

Пишувајќи на својата мрежа „Трут Соушл“ во неделата, Трамп избегна да ја обвини Русија за војната. Наместо тоа, тој рече дека неговиот претходник Џо Бајден е одговорен и дека му дал на Киев „сè за беспари“.

„Раководството на Украина изрази нула благодарност за нашите напори, а Европа продолжува да купува нафта од Русија“, напиша Трамп.

Европските лидери јасно ставија до знаење дека барањата изготвени од Москва, а поддржани од Трамп, се главно неприфатливи. Претседателката на Европската комисија, Урсула фон дер Лајен, рече дека границите на Украина не можат да се менуваат со сила. Ограничувањето на вооружените сили на земјата би ја оставило „ранлива на идни напади“, додаде таа.

Германскиот канцелар Фридрих Мерц изјави дека е скептичен оти може да се постигне договор оваа недела, со оглед на „моменталните разлики“.

Во неделата, Рубио и Виткоф пристигнаа во Женева заедно со секретарот на американската армија, Ден Дрискол, кој минатата недела имаше разговори со Зеленски во Киев. Тие се сретнаа со украинска делегација предводена од шефот на кабинетот на Зеленски, Андриј Ермак. Претходно, тимот од Киев разговараше со официјални претставници од Франција, Германија и Обединетото Кралство, вклучувајќи го и советникот за национална безбедност на Кир Стармер, Џонатан Пауел.