Американскиот државен секретар Марко Рубио вчера остро ја критикуваше казната од 120 милиони евра (140 милиони долари) што Европската Унија (ЕУ) ѝ ја изрече на платформата за социјални медиуми Икс (X) за кршење на нејзините правила за транспарентност.

„Казната од 140 милиони долари на Европската комисија не е само напад врз Икс, туку е напад врз сите американски технолошки платформи и американскиот народ од страна на странски влади“, напиша Рубио на платформата во сопственост на технолошкиот милијардер Илон Маск. „Деновите на цензурирање на Американците на Интернет се завршени“, додаде тој.

Европската комисија го обвинува Икс за лажно автентицирање на кориснички сметки со сини ознаки, за прикривање податоци од истражувачите и за недокументирање на рекламите поставени на платформата. Износот на казната е пропорционален на прекршокот, нагласи Комисијата вчера при објавувањето.

„Измамувањето на корисниците со сини ознаки, прикривањето на информациите во рекламите и исклучувањето на истражувачите немаат место онлајн во ЕУ“, изјави потпретседателката на Европската комисија, Хена Виркунен.

Икс може да покрене законска постапка против одлуката, што на крајот би можело да го одведе случајот до Европскиот суд на правдата (ЕСП).

Одлуката против Икс се базираше на Законот за дигитални услуги на ЕУ. Ова ризикува дополнително затегнување на односите со САД.

Потпретседателот на САД, Џ. Д. Венс, завчера напиша на Икс дека „ЕУ треба да ја поддржува слободата на говорот, а не да ги напаѓа американските компании поради ѓубре“. Американскиот претседател Доналд Трамп претходно ги критикуваше европските дигитални закони како антиконкурентски.