Владата на Доналд Трамп планира да бара од сите странски туристи да ја достават својата историја на социјалните мрежи од последните пет години пред да влезат во земјата, според известување објавено во Федералниот регистар. Податоците би биле задолжителни за оние кои првпат влегуваат во САД, без оглед на тоа дали доаѓаат од земји на кои им се потребни визи.

Овој драстичен потег е најновиот обид на Трамп за проверка на оние кои влегуваат во земјата, откако минатата недела беше објавено дека се суспендира имиграцијата од 19 земји.

Велика Британија и Германија се меѓу земјите на чии граѓани не им треба виза за посета на САД, но ова би можело да им создаде дополнителна пречка.

Покрај историјата на социјалните мрежи, Агенцијата за царинска и гранична заштита ќе додаде и други полиња за собирање податоци, вклучувајќи е-адреси и телефонски броеви користени во последните пет години, како и адресите и имињата на членовите на семејството, се вели во известувањето. Се додава дека американската јавност ќе има 60 дена за да го коментира предлогот.

САД ќе бидат домаќини на Светското фудбалско првенство 2026 и на Олимписките игри 2028, кога се очекува стотици илјади странски фанови да дојдат во земјата.