МНТ ГО ПРОСЛАВИ 80-ГОДИШНИОТ ЈУБИЛЕЈ СО ЛЕГЕНДИТЕ КОИ ГО СОЗДАВАЛЕ ТЕАТАРОТ

Театарските легенди кои го создавале и обликувале Македонскиот народен театар (МНТ) оживеаја во мултимедијалната претстава „Сонцето, колку е блиску сонцето – Made in MNT“ во режија на Дејан Пројковски, со која синоќа МНТ го прослави 80-годишното постоење.

Насловот „Сонцето, колку е блиску сонцето“ е преземен од првата изговорена реплика на сцената на МНТ со која на 3 април 1945 почнува работата на театарот. Tогаш, актерката Вера Вучкова која имаше неполни 20 години, во улогата на Валја ја изговори оваа прва реплика од првата претстава на МНТ, „Платон Кречет“ во режија на Димитар Ќостаров.

Весна Петрушевска како Госпоѓа министерка во тандем со Илина Чонкова, во истата улога која ја играше легендарната Мери Бошкова. (Фото: К. Галевски)

Од Сомнителното лице на Петре Прличко, Госпоѓата министерка на Мери Бошкова, „Сердарот“, „Болен Дојчин“, „Силјан Штркот“, ликовите од драмите на Војдан Чернодрински, Ристо Крле, Ташко Георгиевски, Васил Иљоски, Горан Стефановски, Дејан Дуковски, звукот на „Тешкото“, сѐ до Осман и Цвета од „Македонска крвава свадба“, претставата која траеше безмалку 3 часа, беше аудиовизуелно патување низ архетипски слики кои се дел од нашата колективна меморија.

Во драматуршката структура користени се материјали од Григор Прличев, Војдан Чернодрински, Ташко Георгиевски, Ристо Крле, Дејан Дуковски, Горан Стефановски, Блаже Конески, Јордан Плевнеш, Петре. М. Андреевски, Коста Рацин, Браќа Миладиновци, Никола Јонков Вапцаров, Коле Неделковски, Васил Иљоски, Гане Тодоровски, Марко Цепенков, Живко Чинго, Коле Чашуле и Крсте Петков Мисирков. Во сцените кои ја раскажуваат историјата на МНТ користени се и текстови од Бранислав Нушиќ, Исак Бабељ, Н.В. Гогољ, Гордан Михиќ и Александар Корнејчук.

Дарја Ризова и Александар Микиќ како Цвета и Осман во сцена од „Балканот не е мртов“ на Дејан Дуковски. (Фото: К. Галевски)

Учествуваа 60 актери, 40-ина од ансамблот на МНТ, како и студенти по актерска игра, актери од други театри, оперски пејачи и деца од драмски студија. Петмина музичари меѓу кои Горан Трајкоски и Сашко Костов изведуваа музика во живо, а вчепатлививите теарски слики беа збогатени со 3-Д мапинг, кореографија, анимации.

Актерот Емил Рубен меѓу гостите. (Фото: К. Попов)

Сценограф на претставата е Валентин Светозарев, костимите се на Марија Пупучевска, сценските движења се на Олга Панго, а З-Д мапингот на Сергеј Светозарев.