Брисел конечно има регионална влада откако партиите постигнаа договор по повеќе од 600 дена политички ќор-сокак.

Седум партии без прекин преговараа од вторникот и лидерот на Реформистичкото движење, Жорж-Луј Бушез, синоќа објави фотографија од бел чад, потврдувајќи дека постигнале договор.

„Со олеснување можеме да објавиме дека по повеќе од 600 дена повторно имаме влада во главниот град на Европа“, рече Бушез, додавајќи дека сите седум партии нашле заеднички јазик.

Брисел беше без регионална влада од изборите во јуни 2024 зашто партиите не успеваа да формираат коалиција, што предизвика хаос во градските финансии. Главниот град на Белгија моментално се соочува со долг од 15 милијарди евра.

Брисел го собори националниот рекорд, откако на Белгија ѝ требаа 541 ден за да формира влада во 2010/11 година. Светскиот рекорд го држи Северна Ирска, која во една прилика била 729 дена без влада, но не влезе во Гинисова книга на рекорди, која зема предвид само независни држави.

Децентрализираниот систем на управување во Белгија значи дека секој од нејзините три региони Валонија, Фландрија и Брисел има своја влада одвоена од националната влада на Белгија.