Пентагон се подготвува за копнени операции во Иран што ќе траат со недели, објави вчера „Вашингтон пост“, повикувајќи се на американски официјални лица. Плановите би можеле да вклучуваат напади од специјалните сили и конвенционалните пешадиски трупи. Дали претседателот Доналд Трамп ќе одобри некој од тие планови останува неизвесно, според весникот.
Администрацијата на Трамп распореди американски маринци на Блискиот Исток додека војната во Иран се протега во својата петта недела, а исто така планира да испрати илјадници војници од 82-та воздушно-десантна дивизија на американската армија во регионот.
Претседателот на иранскиот парламент денеска ги предупреди САД против копнена инвазија, заканувајќи се дека ќе ги „запали“ американските трупи и ќе ги засили нападите врз сојузниците на САД, според иранските официјални медиуми. Мохамед Багер Калибаф рече дека иранските сили „чекаат пристигнување на американски трупи на терен за да ги запалат и да ги казнат своите регионални партнери засекогаш“. Тој додаде: „Продолжуваме со ракетирањето. Нашите ракети се на место. Нашата решителност и вера се зголемија“.
Тој кажа дека планот на САД од 15 точки што Пакистан му го предаде на Иран минатата недела е „нивни желби“ и рече дека администрацијата на Трамп се обидува преку планот да го направи она што не успеа да го постигне со сила.
„Додека Американците бараат предавање на Иран, нашиот одговор е јасен: нема шанси да прифатиме понижување“, рече Багер.
Ризикот од проширена војна со Иран се зголеми откако Хутите од Јемен, кои се поврзани со Иран, вчера ги започнаа своите први напади врз Израел од почетокот на конфликтот, додека дополнителни американски сили стигнаа до Блискиот Исток. Вашингтон испрати илјадници маринци на Блискиот Исток во едномесечната војна. Првиот од двата контингенти пристигна завчера со амфибиски јуришен брод, соопшти вчера американската војска.
Војната, започната на 28 февруари со американските и израелските напади врз Иран, се прошири низ Блискиот Исток, убивајќи илјадници и погодувајќи ја светската економија со најголемото нарушување на глобалните енергетски резерви досега.
Државниот секретар Марко Рубио завчера изјави дека САД можат да ги постигнат своите цели без копнени трупи, но дека распоредуваат дел во регионот за Трамп да има „максимална“ флексибилност за прилагодување на стратегијата.
Пакистан, потенцијален посредник меѓу Вашингтон и Техеран, од денеска ќе биде домаќин на дводневни разговори со министрите за надворешни работи на Саудиска Арабија, Турција и Египет, барајќи начини за ублажување на регионалните тензии, еден ден откако иранскиот претседател Масуд Пезешкијан разговараше со пакистанскиот премиер Шехбаз Шариф.
Израелската војска денеска соопшти дека еден ден претходно ја таргетирала инфраструктурата за производство на оружје на Техеран, вклучувајќи десетици места за складирање и производство. Пет лица беа убиени во напад врз пристаниште во јужниот пристанишен град Бандар-е-Камир, во кој беа уништени и два брода, објавија денеска иранските државни медиуми.
