Цените на нафтата на светските берзи го достигнаа највисокото ниво од 2022 година по информациите дека американската војска подготвува планови за потенцијална нова воена акција против Иран. Цената на нафтата од типот „брент“ во еден момент порасна за речиси 7 отсто, надминувајќи 126 долари за барел, пред повторно да забележи пад.

Порталот „Аксиос“ објави дека Централната команда на САД подготвила планови за серија кратки и силни напади врз Иран за да се излезе од ќор-сокакот во преговорите со Техеран. Овие планови, кои според анонимни извори вклучуваат напади врз инфраструктурни цели, треба да му бидат презентирани на претседателот Доналд Трамп. Една од предложените опции вклучува и преземање на дел од Ормускиот Теснец со цел повторно да се отвори за комерцијален транспорт, што би можело да вклучи и ангажман на копнени трупи.

Енергенсите поскапуваат во период кога мировните преговори се во застој, а клучниот воден пат во Ормускиот Теснец е практично затворен. Преку овој теснец вообичаено минува околу 20 отсто од светската нафта и течен природен гас, па конфликтот предизвика глобален скок на цените на енергијата.

Иако барелот нафта „брент“ достигна цена од 126,31 долари, што е највисоко ниво од почетокот на руската инвазија врз Украина, цената подоцна падна на околу 114 долари. Аналитичарите од компанијата „Кплер“ објаснуваат дека ваквите нагли промени се должат на истекувањето на терминските договори за испорака во јуни.

Американската администрација соопшти дека ќе ги блокира иранските пристаништа сè додека Техеран претставува закана за бродовите во Ормускиот Теснец. Иран претходно се закани со напади врз пловилата како одговор на американско-израелските воздушни напади.