Русија планира да ја распореди својата нова интерконтинентална балистичка ракета „РС-28 сармат“ подоцна оваа година, изјави командантот на руските Стратешки ракетни сили по пробното лансирање утрово.

„Лансирањето беше успешно, а целите на мисијата беа постигнати“, му рече генерал-полковникот Сергеј Каракаев на Владимир Путин. Тој додаде дека тестот го отвора патот за вооружување на Стратешките ракетни сили со „сармат“ во нивната единица во Краснојарската област до крајот на 2026 година.

Путин првпат го претстави „сармат“ во 2018, тврдејќи дека поседува речиси неограничен дострел и можност за избегнување на напредна ракетна одбрана. Сепак, минатиот октомври призна дека ракетата сè уште не е оперативна.

„Вкупната носивост на ‘сармат‘ е четирипати поголема од кој било постоечки еквивалент. Балистичките и суборбиталните траектории на ракетата овозможуваат оперативен дострел што надминува 35.000 километри“, кажа Путин.

„Сармат“, наречен „Сатана 2“ од западните аналитичари, е дизајниран да носи повеќе нуклеарни боеви глави и е камен-темелник на рускиот арсенал од следната генерација.