До крајот на месецов треба да завршат градежните работи за проширување и воведување нов сообраќаен режим на улиците за приклучок кон подземната улица под зградите на „Лимак“.
Според проектот на Град Скопје и новиот сообраќаен режим, од Јужен булевар кон Кисела Вода ќе се оди по улицата која минува кај кафеаната „Ив“, која ќе биде еднонасочна. На улицата ќе има семафор за вртење лево и приклучување на улицата Есенинова и движење кон Општина Аеродром.
„Во овој дел е предвидено да се изгради натпатник кој ќе води кон улицата Есенинова“, велат од Град Скопје.
- ГРАД СКОПЈЕ ОД ТРИ НАПРАВИ ДВЕ ЛЕНТИ НА УЛИЦАТА 11 ОКТОМВРИ КОН РАМПА И „ТУТУНСКИ КОМБИНАТ“
- ПОЧНА ПРОШИРУВАЊЕ НА УЛИЦИТЕ ЗА ВЛЕЗ ВО ПОДЗЕМНАТА СООБРАЌАЈНИЦА ПОД „ЛИМАК“ ОД КАЈ КИСЕЛА ВОДА, ЃОРЃИЕВСКИ РЕЧЕ ДЕКА ЌЕ БИДЕ ГОТОВО ЗА 90 ДЕНА
Улицата која минува покрај објектите на Пазарна иснпекција и води кон Тутунски комбинат ќе биде еднонасочна во спротивен правец. Тоа значи дека повеќе нема да може од Јужен булевар да се врти лево за да се оди кон Тутунски комбинат и Аеродром, туку движењето ќе биде од обратна насока, од Тутунски комбинат кон Јужен булевар за влез во подземната улица.
Со реконструкцијата на овој дел, крстосницата на улицата 11 Октомври од Центар кон Кисела Вода и Тутунски комбинат од три доби две ленти. Пред Град Скопје да почне со реконструкција, овој дел имаше три ленти, две за право кон Рампа и една за лево, за возилата кои преку Тутунски комбинат одат кон Аеродром. Сега овој дел е стеснет бидејќи е изведена жардиниера и има две ленти.
Изградбата на првата фаза од проектот за подземната сообраќајница чини 77 милиони денари или 1,2 милиони евра, а градежните работи ќе ги изведува фирмата „Ленди груп“ од Скопје.
А. АНТЕВСКА
