Доналд Трамп предупреди дека на Иран му истекува времето, додека мировните разговори се во застој веќе некое време.

„Подобро да се движат брзо или нема да остане ништо од нив. Времето е од суштинско значење“, кажа Трамп, кој синоќа разговарал со израелскиот премиер Бенјамин Нетанјаху.

Иранските медиуми објавија дека САД не направиле никакви отстапки во својот одговор на последните предлози на Техеран за завршување на војната.

„Недостатокот на компромис од Вашингтон ќе доведе до ќор-сокак во преговорите“, објави полуофицијалната новинска агенција „Мер“.

Трамп во повеќе наврати му поставуваше ултиматуми на Иран, а потоа се повлекуваше. Тој минатата недела предупреди дека примирјето е на апарати за одржување во живот откако ги отфрли иранските барања како целосно неприфатливи. Тие вклучуваа моментален прекин на војната на сите фронтови и прекин на американската блокада на иранските пристаништа.

„Прстите на нашите вооружени сили се на чкрапалото, додека дипломатските напори продолжуваат“, изјави Мохсен Резаи, воен советник на иранскиот врховен водач.

Израел се координира со САД за евентуално продолжување на нападите, изјавија две лица запознати со ситуацијата. Во разговор со својот кабинет вчера, Нетанјаху рече дека „нашите очи се отворени и подготвени сме за секакво сценарио“.