УЕФА остро ја критикуваше шокантната одлука на ФИФА да не ја потврди автоматската суспензија од еден меч за американскиот репрезентативец Фоларин Балоган, нарекувајќи ја „невидена, неразбирлива и неоправдана“.
Напаѓачот на САД, кој доби директен црвен картон против Босна и Херцеговина, требаше да ја отслужи суспензијата на осминафиналниот натпревар на СП против Белгија, кој се игра ноќва. Но, ФИФА одлучи да ја одложи казната, што значи дека Балоган ќе може да игра.
Повикувајќи се на добро упатени извори, „Си-Би-Ес њуз“ потврди дека казната за Балоган била одложена откако Доналд Трамп во четвртокот му се јавил на претседателот на ФИФА, Џани Инфантино и разговарале за суспензијата. И државниот секретар на САД, Марко Рубио, јавно повика на укинување на казната.
„Интервенцијата за ефикасно поништување на суспензијата ја премина црвената линија. Автоматската суспензија од еден натпревар не е дискрециона опција и е принцип вграден во прописите. Кога сигурноста на правилата повеќе не е гарантирана од нејзините чувари, интегритетот на спортот се доведува во прашање, а кредибилитетот на натпреварувањето е поткопан. Исто така, таквата одлука создава преседан на тековниот турнир, каде што слични ситуации сега ќе бараат еднаков третман, на штета на натпреварувањето“, соопшти УЕФА.
Белгиската фудбалска асоцијација изјави дека е зачудена од одлуката на ФИФА и најави жалба.
ФИФА не даде објаснување за одлуката, освен што се повика на Член 27 од својот дисциплински правилник, кој дозволува казните да бидат одложени. Овој член никогаш досега не бил активиран на СП. Трамп ѝ се заблагодари на ФИФА за „исправување голема неправда“.
