Европските земји пријавија повеќе од 10.000 дополнителни смртни случаи за време на рекордниот топлотен бран што го зафати западниот дел од континентот кон крајот на јуни, покажаа официјалните податоци. Огромно мнозинство, повеќе од 9.000, биле луѓе на возраст од 65 години и повеќе, според податоците објавени од „EuroMOMO“, мрежа поддржана од Европскиот центар за превенција и контрола на болести и Светската здравствена организација.

„Да се ​​има ваков вишок на смртност во ова време од годината е невообичаено. Навистина е висок. Тешко е да се објасни со нешто друго освен со екстремната топлина“, изјави Ласе Вестергард, главен лекар во данскиот институт „Статенс серум“, каде што е седиштето на „EuroMOMO“.

Научниците рекоа дека топлотниот бран кон крајот на јуни би бил практично невозможен без климатските промени предизвикани од човекот, кои ги прават топлотните бранови почести и поинтензивни.

Податоците, кои се собрани од националната статистика за смртност во 27 европски земји, вклучуваат дополнителни смртни случаи од сите причини во текот на неделата од 22 до 28 јуни, кога топлотниот бран достигна врв во Франција, Шпанија, Велика Британија и други земји. Но, научниците рекоа дека нема други познати големи фактори што би придонеле за дополнителни 10.650 смртни случаи во таа недела.

„EuroMOMO“ забележа дека Франција и Белгија беа единствените две европски земји што пријавија „многу висок вишок на смртност“ во последната недела од јуни. Посебна научна студија процени дека во Англија и Велс починале 2.700 луѓе од причини поврзани со топлината за време на топлотните бранови во мај и јуни.