Владата барала од УНЕСКО да ѝ даде рок од шест години за да постапи во однос на забелешките за заштита на Охридскиот Регион за да не биде ставен на Листата на светско наследство во опасност. Во најновата Нацрт-одлука на Комитетот за светско наследство на УНЕСКО се предлага „Природното и културното наследство на Охридскиот Регион (Албанија, Северна Македонија) да биде впишано на Листата на светско наследство во опасност“. Конечната одлука Комитетот треба да ја донесе на 22 јули, во рамкитe на 48. сесија, што од 19 до 29 јули ќе се одржи во Бусан, Јужна Кореја.

• НИШТО НЕ Е СПРОВЕДЕНО ЗА ЗАШТИТА, УНЕСКО ПОВТОРНО ПРЕДЛАГА ОХРИДСКИОТ РЕГИОН ДА БИДЕ ВПИШАН НА ЛИСТАТА СВЕТСКО НАСЛЕДСТВО ВО ОПАСНОСТ
• ПРОБЛЕМОТ НА ОХРИД СО УНЕСКО Е НАСЛЕДЕН ОД ЛОШИТЕ ИЗВЕШТАИ ВО ВРЕМЕ НА СДСМ, ВЕЛАТ ВЛАДАТА И МИНИСТЕРСТВОТО ЗА КУЛТУРА
• ЗА ДА СЕ ЗАШТИТИ ОХРИД, УНЕСКО ТРЕБА ДА ГО СТАВИ НА ЛИСТАТА СВЕТСКО НАСЛЕДСТВО ВО ОПАСНОСТ, ВЕЛАТ АКТИВИСТИТЕ
• УНЕСКО ГИ ИЗНЕВЕРИ СОПСТВЕНИТЕ ПРИНЦИПИ И ГО НАГРАДИ НЕПОЧИТУВАЊЕТО НА КОНВЕНЦИЈАТА ЗА СВЕТСКО НАСЛЕДСТВО, ОБВИНУВААТ 40 ОРГАНИЗАЦИИ ОТКАКО ОХРИДСКИОТ РЕГИОН НЕ БЕШЕ СТАВЕН НА ЛИСТАТА ВО ОПАСНОСТ

Одговарајќи на новинарско прашање при посетата на Општина Дебарца, премиерот Христијан Мицкоски денеска кажа дека Владата не може за две години да поправи нешто што со децении е уништувано.

„Тоа е наследен проблем од порано. Ние презедовме активности како ниту една влада претходно. Тука беа луѓето од УНЕСКО пред некоја недела. Имаа работен викенд, ги посетија сите општини, разговараа со сите релевантни чинители, вклучително и со мене во Владата. Бараме да ни дадат период од шест години за да го исправиме тоа што било констатирано во минатото. И супермени да бевме, за две години не можеме да исправиме нешто што три и пол децении било расипувано. А, во овој случај, богами и малку повеќе, кога станува збор за дивоградбите и сето она што е правено долж охридското крајбрежје“, рече Мицкоски.

Во овој период 2017-2025, од СДСМ беа градоначалници Јован Стојановски (2017-2018) и Константин Георгиески (2018-2021), а од 2021 досега градоначалник е Кирил Пецаков од ВМРО-ДПМНЕ. Токму локалната власт ги издава дозволите за градба и треба да ги урива дивоградбите.

• ВО ОХРИД ИМА 4.847 ДИВОГРАДБИ, МЕЃУ КОИ ЗГРАДИ И ХОТЕЛИ, ОД 456 РЕШЕНИЈА ЗА УРИВАЊЕ НИЕДНО НЕ Е СПРОВЕДЕНО, УТВРДИЛ ДРЖАВНИОТ РЕВИЗОР
• ОБВИНИТЕЛСТВОТО ВЛЕЗЕ ВО ОПШТИНА ОХРИД ПО СОМНЕВАЊАТА ЗА КОРУПЦИЈА ВО ИЗВЕШТАЈОТ НА ДРЖАВНИОТ РЕВИЗОР
• УТВРДЕНИТЕ СЛАБОСТИ ВО ИЗВЕШТАЈОТ НА ДРЖАВНИОТ РЕВИЗОР ЗА ОХРИД СЕ РЕЗУЛТАТ НА ДОЛГОГОДИШНИ ПРАКТИКИ И НАСЛЕДЕНИ СОСТОЈБИ, ВЕЛИ ПЕЦАКОВ

На 16 јули, откако излезе Нацрт-одлуката со која УНЕСКО предлага Охридскиот Регион да се стави на Листата на светско наследство во опасност, од Владата за САКАМДАКАЖАМ.МК изјавија дека проблемот со зачувувањето на статусот на Охридскиот Регион под УНЕСКО е наследен преку лошите извештаи добиени во периодот на владеење на претходната власт.

И лани, кога Комитетот за светско наследство на УНЕСКО им додели уште една година грејс-период на Македонија и Албанија наместо да го впише Охридскиот Регион во Листата на светско наследство во опасност, премиерот Христијан Мицкоски изјави дека претходната власт е виновна што не се исполнети обврските кон УНЕСКО.

Мицкоски денеска рече дека овој процес не зависи само од Македонија, туку и од Албанија, бидејќи Охридското Езеро е заедничко природно наследство.

Комитетот за светско наследство на УНЕСКО и лани, на 47. сесија, во Нацрт-одлуката предложи Охридскиот Регион да биде ставен на Листата на светски природни и културни богатства во опасност. Но, Владата поднесе амандман да се повлече таа одлука и УНЕСКО им даде уште една година грејс-период на Македонија и Албанија. Ова беше жестоко осудено од 40 организации од Македонија, Албанија и други земји од Европа, кои обвинија дека Комитетот повторно ги игнорирал препораките на експертите.