Австрија се изјасни против брзото пристапување на Украина во Европската Унија, при што министерката за европски прашања, Клаудија Бауер, упати критики кон претседателот Володимир Зеленски.

„Мојот впечаток е дека украинскиот претседател во последните месеци често го свртува вниманието кон себе со желбата да диктира датум за пристапување во ЕУ“, изјави Бауер за неделното издание на весникот „Велт“. „Забрзано пристапување по барање очигледно не е можно“.

Таа објасни дека постои обврска внимателно да се разгледа капацитетот на ЕУ за примање нови членки. „Пристапувањето на Украина, со нејзините 39 милиони жители и сосема поинаква земјоделска структура, значително би ја изменило ЕУ“.

Таа исто така предупреди на опасноста од создавање „општество со две брзини“ како последица на пристапувањето. „Сите земји-кандидати, вклучително и Украина, мора да ги почитуваат истите правила и да го заслужат пристапувањето преку сопствени напори“, додаде таа.

ЕУ ги започна преговорите за пристапување со Украина во средината на јуни оваа година. Првата фаза од преговорите ќе се фокусира на теми како што се правосудниот систем, заштитата на основните вредности и безбедноста. Сепак, за пристапувањето сè уште се потребни бројни реформи во Украина, на пример во борбата против корупцијата.

Претходно оваа година, Зеленски повика на пристапување во ЕУ уште во 2027 година, и покрај широкиот скептицизам во некои европски земји.