УЕФА, Азиската фудбалска конфедерација (АФЦ) и КОНКАКАФ (Кариби, Северна и Централна Америка) издадоа заедничка изјава во која го напаѓаат претседателот на ФИФА, Џани Инфантино, поради неговите планови за продажба на уделот во комерцијалните права на Светското првенство. Во изјавата се вели дека Инфантино ја скршил довербата преку измама со сега отфрлениот предлог и се поставил над колективот, при што трите федерации повикаа на целосна независна анализа на она што се случило.

„Силата на фудбалот отсекогаш била неговото единство. Апелираме тоа единство да се почитува сега. Лидерството треба да му служи на фудбалот, а не да се стреми да го командува“, се вели во писмото, во кое не се бара директно оставка од Инфантино.

Ова уследи откако ФИФА викендов издаде соопштение во кое остро ги критикуваше „координираните и континуирани напори за поткопување на организацијата и Инфантино“.

Инфантино се соочи со отворен бунт во фудбалскиот свет откако предложи, а потоа се откажа од план за продажба на 20% од комерцијалните права за Светското првенство на приватни инвеститори за да се соберат околу 4,2 милијарди долари. УЕФА, поддржана од АФК и КОНКАКАФ, се закани дека ќе ги бојкотира натпреварувањата на ФИФА сè додека не добие ветување дека нема да бидат предложени слични шеми во иднина.

Инфантино потоа доби поддршка од сите 54 членки на Африканската фудбалска конфедерација, како и од Аргентина, Боливија, Парагвај, Еквадор и Мексико.

Речиси 70 од 211-те членки на ФИФА јавно изјавија дека ќе гласаат за реизборот на Инфантино следната година, а десетина или ја повлекоа претходно ветената поддршка или рекоа дека нема да гласаат за него.