Со знамиња, свечени говори и цвеќиња фрлани од воени хеликоптери, исламистичките талибанци во Авганистан ја одбележаа петгодишнината од преземањето на власта.
„Денес, светогледите и вредностите на авганистанската влада и нацијата се во согласност“, изјави министерот за надворешни работи Амир Кан Мутаки на церемонија во главниот град Кабул, пренесувана од државната телевизија РТА.
Во извештај на авганистанската телевизија „Толоњус“ беше прикажано како од воен хеликоптер се фрлаат цвеќиња над Кабул. Во изминатите денови во главниот град на Авганистан беа обновени талибанските знамиња со црни натписи на бела позадина. Медиумските извештаи покажаа церемонии и автоколони и во други делови од земјата.
По најавата за повлекување на силите на НАТО и САД кон крајот на летото 2021 година, талибанците на 15 август практично без отпор го зазедоа Кабул. Потоа следуваа хаотични сцени, особено на аеродромот, додека западните земји се обидуваа да го евакуираат својот персонал и авганистанските соработници.
Претходно, по терористичките напади на Ал Каеда од 11 септември 2001 година врз цели во САД, меѓународна коалиција војуваше против талибанците во Авганистан, кои тогаш за првпат владееја со земјата. Тие беа обвинети дека ѝ даваат засолниште на Ал Каеда.
Само американските вооружени сили до 2021 изгубија повеќе од 2.300 војници во регионот на Хиндукуш. Германската армија имаше 59 загинати припадници. Универзитетот Браун проценува дека во речиси дваесетгодишната војна биле убиени повеќе од 46.000 цивили и речиси 70.000 припадници на авганистанските безбедносни сили.
Авганистан денес се соочува со тешка хуманитарна криза. Пристапот до меѓународна помош е значително ограничен и поради владеењето на талибанците. Исламистите сериозно ги ограничуваат слободата на изразување, како и правата и пристапот до образование за жените и девојчињата.
Критичарите посочуваат дека германската сојузна влада, од една страна, не ги признава талибанците поради нивните прекршувања на човековите права, но од друга страна прави практични отстапки за да овозможи спроведување на депортации.
