Во руските воздушни напади во саботата загинаа девет лица, десетици се повредени, а оштетени се згради и инфраструктура низ Украина, додека Киев се подготвува за исклучително тешка зима во услови на засилени удари врз земјата. Бројот на цивилни жртви во Украина нагло порасна во изминатите два месеца, во период кога Русија ги засилува нападите врз електраните и останатата инфраструктура. Истовремено, Украина погоди енергетски капацитети и магацини во оддалечени делови на Русија, а двете страни гаѓаа и меѓусебни поморски транспортни рути.

Украинскиот претседател Володимир Зеленски, во објава на Телеграм, соопшти дека Русија од раните утрински часови употребила речиси 500 дронови врз украински цели. Тој напиша дека руските сили ја прошириле војната подалеку од фронтот, каде што немаат успех, насочувајќи ги нападите кон економијата. Според него, руската тактика е наједноставна можна, односно уништување на секоја локација што би можела да им помогне на луѓето да се справат со условите на војната, додавајќи дека целта на Москва е да ја уништи украинската економија и да го скрши отпорот на земјата.