Литванскиот претседател Гитанас Науседа изјави дека борбените авиони на НАТО собориле дрон во воздушниот простор на Литванија. Властите кажаа дека дронот веројатно влегол во јужна Литванија, во близина на вториот по големина град Каунас, од соседна Белорусија кратко по полноќ.

„Дрон кој штотуку влегол во литванскиот воздушен простор бил уништен од борбени авиони на НАТО“, напиша Науседа на Икс.

Потеклото на дронот сè уште не е утврдено. Ноќеска во главниот град Вилнус и во околниот регион се огласија тревоги за дронови.

„Вооружените сили на Литванија и италијанските пилоти кои служат во Мисијата за воздушна одбрана на НАТО реагираа брзо и одговорно на упадот со дрон“, соопшти министерството за одбрана на Литванија.

Литванија дели голем дел од својата јужна и источна граница со Белорусија, клучен руски сојузник. Дронови биле забележани во земјата и викендов. Центарот за управување со кризи подоцна соопшти дека еден објект најверојатно навлегол од Белорусија и прелетал преку територијата на земјата, пред да влезе во рускиот воздушен простор.