Израелскиот амбасадор во Германија, Рон Просор, предупреди на непосредна егзистенцијална закана за еврејската заедница во Берлин откако крајнолевичарската партија Левица победи на регионалните избори во германскиот главен град.
„Силниот настап на Левица на изборите во Берлин треба да ги загрижи сите кои се грижат за понатамошното постоење на еврејскиот живот во овој град“, изјави Просор.
Тој кажа дека Левица, наследничка на Комунистичката партија што владееше со поранешна Источна Германија, покажала „апсолутно неконтролиран антисемитизам“.
„Ова добива нова политичка димензија со нејзиниот подем во најголема сила. За еврејската заедница во Берлин, теоретската закана станува конкретна и непосредна егзистенцијална опасност“, смета Просор.
Со победата на Левица, нејзината водечка кандидатка, 45-годишната Елиф Ералп, би можела да стане првата градоначалничка на Берлин од редовите на оваа партија и прва со турско потекло. Берлинскиот огранок на партијата се обвинуваше за антисемитизам поради неговите ставови за конфликтот на Блискиот Исток.
Во мај, Ералп објави план од пет точки, во кој вети дека ќе го заштити и зајакне еврејскиот живот во Берлин.
