ДВЕТЕ СЕРИИ НА БСЖ ВАКЦИНАТА КАЈ НАС СЕ ИСКОРИСТЕНИ ДО ЛЕТОВО, НЕМА НЕСАКАНИ ЕФЕКТИ, КАЖА КЛЕКОВСКИ ОТКАКО ХРВАТСКА ЈА СУСПЕНДИРАШЕ

Двете серии на вакцината БСЖ кои предизвикаа сомнеж за неисправност во Хрватска во нашата земја се искористени до летово, без несакани дејства. Министерот за здравство Сашо Клековски кажа дека станува збор за серии бр. 6831 од 22.12.2022 година и серија број 807-1 од 11.12.2023 година. И двете серии се целосно искористени до летото оваа година.

„Во нашата држава нема документирани несакани ефекти поврзани со примена на овие серии. Министерството, заедно со надлежните институции, спроведува дополнителни анализи, а јавноста ќе биде навремено информирана за нивните резултати. Министерството за здравство ќе обезбеди непрекинато продолжување на вакцинацијата со БСЖ вакцина, во соработка со УНИЦЕФ. Ги повикуваме родителите да продолжат со редовна вакцинација на децата според календарот за имунизација. Вакцинацијата останува најсигурната заштита за здравјето на децата“, рече Клековски на денешната прес-конференција.

Станува збор за вакцината произведена од бугарската компанија „Бул Био НЦИПД“ од Софија.

Вчера, Македонија го одложи вакцинирањето на новороденчиња со вакцината БСЖ, откако Хрватска ја прекина имунизацијата поради несакани реакции. Проф. д-р Александра Грозданова, претседателка на Комисијата за имунизација,кажа дека оваа вакцина се користи повеќе од 20 години кај нас и оти истата се користи и во Бугарија како земја-производител, меѓутоа и во неколку европски земји, како што се Хрватска, Унгарија и Романија. Имајќи ги предвид четирите пријавени случаи во Хрватска, Комисијата за имунизација ја контактирала Агенцијата за лекови МАЛМЕД.

„Во нашата земја е пријавен само еден случај, којшто воопшто не е остеомиелитис – воспаление на коска – она што е пријавено во Хрватска, туку станува збор за локална реакција при апликација на БСЖ вакцината и тоа било во 2022“, кажа Грозданова.

„Разгледувајќи ги аспектите коишто ги имаме во предвид, а тоа е дополнително дека Македонија е земја од ризик во однос на туберкулозата и дека кај нас е задолжителна оваа вакцинација, за разлика од Хрватска каде што имаат многу низок степен во однос на туберкулозата, од голем интерес е вакцинацијата да биде на високо ниво, особено и со оваа вакцина. И затоа, оваа вакцина е во редовниот задолжителен календар во нашата земја“, рече таа.

Таа додаде дека од Институтот за туберкулоза пријавиле оти имаат 95 пациенти, од кои 83 се регистрирани во 2026, активни случаи на туберкулоза. Во моментов, во Клиниката за белодробни заболувања кај децата „Козле“ се хоспитализирани три деца, активни случаи, за 2025 тие имале 15 случаи, а во 2026, 12 нови случаи.

А. АНТЕВСКА