Пред изборите на 25 октомври во Србија, власта ја засилува контролата врз медиумскиот простор, додека професионалните медиуми се соочуваат со сè поголеми притисоци, предупредуваат соговорници на „Дојче веле“.

Предизборната кампања во Србија е обележана со засилена медиумска пропаганда, говор на омраза и притисоци врз професионалните медиуми. Провладините телевизии и таблоиди сè поотворено ја поддржуваат власта, додека Студентската листа е честа мета на дезинформации и навреди.

Претседателот на Независното здружение на новинари на Србија (НУНС), Жељко Бодрожиќ, оценува дека станува збор за една од најдрастичните кампањи во поглед на прекршувањето на медиумските правила. Тој предупредува дека притисоците се прошируваат и врз професионалните редакции, меѓу кои телевизиите Н1 и Нова С, чии нови сопственици предизвикуваат загриженост за нивната уредувачка независност.

Пензионираниот професор Раде Вељановски смета дека агресивната реторика и вулгарниот говор стануваат нормализирани во јавниот простор. Според него, и Радио-телевизија Србија (РТС) не ја исполнува доволно својата улога на јавен сервис, туку најголемиот дел од просторот ѝ го отстапува на власта.

Соговорниците сметаат дека медиумската кампања можеби ќе има ограничено влијание врз изборниот резултат, бидејќи голем дел од гласачите веќе ги формирале своите ставови. Бодрожиќ, сепак, смета дека контролираните медиуми можеби ѝ нанесуваат штета и на самата власт, бидејќи граѓаните сè почесто бараат алтернативни извори на информации.