Израелска фирма за технологија за надзор спроведе голема операција за инфицирање на мобилни телефони со шпионски софтвер користејќи онлајн реклами за хакирање на уредите, соопштија истражувачите. Веб-страниците на ЕУ и НАТО прикажувале онлајн реклами поврзани со израелски софтвер за хакирање.

Истрагата на „Ситизен лаб“ на Универзитетот во Торонто и фирмата за сајбер безбедност „Конфајант трет интелиџенс“ (Confiant Threat Intelligence) откри техника на инфекција базирана на реклами развиена од израелска компанија што истражувачите ја нарекоа „адфекшн“ (AdFection). Хакирањето ги претвори легитимните онлајн рекламни системи за шпионски цели во оружје, дозволувајќи им на производителите на шпионски софтвер да се поврзат со милиони уреди и да идентификуваат, следат и таргетираат жртви.

„Вклучувањето во екосистемот на онлајн рекламите ѝ обезбедува на платеничката индустрија за шпионски софтвер прикриен систем за испорака“, рече Бил Марцак, виш истражувач во „Ситизен лаб“. Тој рече дека наодите се „сигурно само врвот на ледениот брег“ за тоа како онлајн рекламите се злоупотребуваат за шпионажа.

Истражувачите открија критични детали за алатките за хакирање анализирајќи уреди што им припаѓаат на новинари и вработени во медиумската мрежа Ал Џезира, откривајќи дека 45 уреди на новинари и вработени биле цел на напади, а некои заразени со шпионски софтвер направен во Израел, познат како „кандиру“ (Candiru).

Во срцето на хакерската кампања е израелската компанија „Дискавер-тек“(Discover-Tech), која се опишува себеси како рекламен бизнис. Истражувачите на „Ситизен лаб“ рекоа дека компанијата го олеснувала надзорот за комерцијални оператори на шпионски софтвер. Нејзината платформа, наречена „Контролиум“( Controlium), наводно им дозволувала на производителите на шпионски софтвер како „кандиру“ – кој во 2025 година беше купен од „Интегрити лабс“(Integrity Labs) – да идентификуваат, следат и таргетираат уреди со вчитување реклами на веб-страници и апликации.
„Дискавер-тек“ и „Интегрити лабс“ не одговорија веднаш на барањето за коментар.

Размерите се фрапантни: Анализата на четири милијарди рекламни записи покажа дека рекламите на „Дискавер-тек“ се појавиле на речиси 200.000 веб-страници и мобилни апликации во десетици земји, во текот на четири месеци. Меѓу веб-страниците на кои се појавувале овие реклами биле и официјалните страници на НАТО, Обединетите нации, Европскиот парламент, Европската комисија и Советот на ЕУ.

Оваа техника го користи системот за наддавање во реално време („real-time bidding“) – автоматизиран систем што го користат платформи како Гугл за продажба на рекламен простор и таргетирање на корисниците. Наместо да ги убедуваат жртвите да кликнат на злонамерен линк, напаѓачите можат да ги искористат рекламите за да ги идентификуваат и, потенцијално, да ги заразат уредите без никаква интеракција од страна на корисникот – техника позната како инфекција „без кликнување“ (zero-click). Според истражувачите, рекламите на „Дискавер-тек“ пренасочувале милиони уреди кон сервери поврзани со „кандиру“, што потенцијално овозможувало надзор и извидување од големи размери. Сепак, тоа не значи дека сите тие уреди биле заразени.

„Ситизен лаб“, со седиште во Торонто, е глобално призната истражувачка група која претходно откри скандали поврзани со шпионски софтвер, насочени кон каталонски политички личности, еден пратеник во Европскиот парламент, како и кон блиските соработници на убиениот саудиски новинар Џамал ​​Кашоги.

Овие наоди поттикнаа повици за спроведување дополнителна истрага.

„Можноста институциите на ЕУ да биле изложени треба да вклучи аларм низ целиот Брисел“, изјави Хана Нојман, германска пратеничка во Европскиот парламент од групацијата на Зелените. Самата Нојман претходно била жртва на операција за сајбер-шпионажа, спроведена од иранска хакерска група.

„Европа не може да тврди дека ја брани демократијата, додека истовремено ги остава сопствените демократски институции ранливи на шпионски софтвер“, рече Нојман.