Осум илустрирани книги за деца на влашки јазик, заедно со аудиосодржини, ќе бидат промовирани на 13 ноември од 18:30 часот во „Јуроп хаус“ во Скопје. Книгите се дел од проектот „Збор по збор“, чија цел е зачувување и промоција на влашкиот јазик преку нов, креативен пристап во учењето. Книгите ќе се делат бесплатно.

„Преку овие осум илустрирани книги за деца и аудиосодржина сакаме да започнеме еден нов креативен начин на учење на јазикот. Целта на овој проект е да го зачуваме нашиот влашки јазик, збор по збор“, велат организаторите од здружението „Тихе Тихеон Скопје“.

Проектот е наменет, пред сè, за најмладите, со цел преку илустрации и аудиосодржини да се поттикне интересот за изучување на влашкиот јазик. Влашкиот, познат и како аромански јазик, припаѓа на романската група јазици и претставува значаен дел од културното и јазичното наследство во Македонија.