Холандската амбасада започнува кампања за намалување на употребата на пластичните ќеси: Имам торба, рече холандскиот амбасадор во Скопје Воутер Пломп на синоќешниот прием по повод Денот на кралот.

„Чистата и здрава средина е важна за сите нас. Утре заедно со нашите партнери Пивара Скопје и Пакомак ќе го имаме првиот клин-ап твит-ап. Најголем дел од ѓубрето што го собравме на претходните акции е пластика. Затоа започнуваме со кампања за намалување на употребата на пластичните ќеси: Имам торба“, кажа во говорот Пломп.

Премиерот Зоран Заев на приемот по повод на Денот на кралот со регионалниот Аташе за одбрана и регионалниот Аташе за полиција и миграции. (Фото: М. Златевска)

Присутните на приемот добија торби, дизајнирани од пет македонски дизајнери и направена од еко памук од холандска компанија во Македонија: Хавеп.

„Користете го хаштагот Имам Торба на социјалните медиуми и бидете нашите први промотори! Промената сепак започнува со секој од нас: сите ние можеме да дадеме свој придонес!“, порача амбасадорот.

Синоќа се славеше роденденот на Кралот Вилем Александер (иако неговиот роденден е утре). (Фото: М. Златевска)

Амбасадорот Пломп го посочи движењето Критичната маса, организирано од На Точак, како јасен пример за тоа како граѓаните можат да придонесат кон промени.

„Ова движење за мене е јасен пример за тоа како граѓаните можат да придонесат кон промени. Скопје започнува да личи на вистински вело-град и горд сум што Амбасадата е дел од овие промени уште од 2008 година, со првата реконструкција на велосипедска патека во Аеродром“, вели амбасадорот Пломп.