На Споменикот на Револуцијата кој се наоѓа во центарот на Тетово со спреј се испишани графити и пароли за фудбалскиот клуб Шкендија, голема Албанија и Илирида. Иако засега не се знае кој го вандализирал споменикот, жителите претпоставуваат дека се навивачи на Шкендија, бидејќи со испишаните графити и името на клубот се слави освојувањето на фудбалското првенство на Македонија. Пароли со ваква и слична содржина се испишани и на повеќе ѕидови низ тетовските улици.

Од СВР Тетово велат дека немаат информации за настанот бидејќи во полицијата никој уште не го пријавил.

Споменикот на револуцијата е во ценѕарото на градот, а слични графити се испишани и на повеќе ѕидови низ тетовските улици (Фото: СДК.МК)

Здружението на борци на Тетово остро го осуди вандализирањето на споменикот.

„Општинската организација на Сојузот на борците од Тетово е крајно револтирана од ваквиот чин кој, за жал, не се случува прв пат бидејќи овој споменик десетици пати е оскрнавен и оштетен во изминатиов период од вакви вандали. Сметаме дека на ова треба да реагира и Општина Тетово како и органите за безбедност, за да се стави веќе еднаш крај на ваквото однесување и сторителите да се пронајдат и казнат. Ваквото скрнавење на спомениците стане веќе перманентна работа. Уште посимптоматичен е и фактот што скрнавењето настана веднаш после положувањето цвеќе пред споменикот со што се одбележа годишнината од убиството на тетовскиот револуционер Иљо Антески – Смок“, велат од Здружението на борци на Тетово.

З. АНДОНОВ