Хуманитарната штафетна трка „Подај рака 2018“, што ја организира здружението на граѓани за поддршка на лица со ретката болест Вилсон – Македонија в недела на кејот на реката Вардар ќе се одржи по четврти пат. Од здружението велат дека средствата што ќе се соберат од котизација за учество во трката ќе бидат искористени за одржување караван во повеќе градови низ Македонија, со кој сакаат да ги запознаат матичните лекари со можните симптоми и начините за рано препознавање на болеста.
„Наша долготрајна цел е да се подигне свеста за Вилсоновата болест и да се поттикне социјалната вклученост на лицата кои се соочуваат со оваа болест“, велат од „Вилсон-Македонија“.
Трката ќе биде штафетна и ќе се трчаат 4 пати по еден километар, а „Вилсон – Македонија“ ја организира со финансиска помош од компанијата ОКТА. За учество во трката, како што велат од Здружението, нема старосни ограничувања. Цената за регистрација за штафетната трка е 150 денари по учесник. Во рамки на настанот ќе има и детска трка, за која нема котизација.
„Симболиката на штафетното трчање е да се покаже дека заеднички можеме да постигнеме повеќе. Симболиката на учеството на лица заболени од Вилсонова и од останати ретки болести е да се покаже дека со најголемиот број ретки болести може да се живее нормален живот, рамноправен со сите здрави луѓе, кога дијагностиката и терапијата се навремено аплицирани. Не помалку важни во оваа трка се и лицата кај кои, најчесто како последица на ненавремена детекција, ретките болести оставиле непоправливи последици. Сакаме да го истакнеме нивното право да не бидат невидливи, туку да бидат рамноправно прифатени и интегрирани во општеството“, вели Маја Алексиевска-Димиќ, претседател на „Вилсон – Македонија“.
Болеста Вилсон предизвикува нарушување во метаболизмот што води до таложење на бакар во црниот дроб, мозокот и очите. Таложењето на бакарот се одвива постепено со години, пред појавата на првите симптоми. Затоа раното откривање на болеста е од пресудно значење за лицата кои носат генетска предиспозиција за тоа, но не се свесни дека се носители на болеста. Навремено откривање на болеста и редовна терапија, овозможуваат нормален живот за пациентите со Вилсонова болест.
