Поради здравствени проблеми, уапсениот ексградоначалник на скопската општина Карпош Стевчо Јакимовски од судија на претходна постапка доби мерка куќен притвор. Неговите двајца пораанешни соработници, раководители во општината, добија мерки на претпазливост.
Еден од нив Т. Ѓ. веќе бил под истрага како обвинет во случајот на СЈО „Топлик“ за Сончев град.
Тројцава беа утринава уапсени по налог на Обвинителката за организиран криминал Вилма Рускоска.
Поранешниот градоначалник на Општина Карпош Стевчо Јакимовски и уште осум други лица се осомничени за неколку кривични дела како незаконска легализација и продажба на земјиште, бесправно градење и садење цвеќе и како што велат од Обвинителството за организиран криминал, со оглед на тоа дека се работи за исти кривични дела и период кога биле сторени, а заради спроведување на единствена постапка, предметите се споени во еден предмет.
За тројцата постои основано сомневање дека сториле кривично дело Злоупотреба на службена положба и овластување, додека едно од лицата, се сомничи и за кривично дело Бесправно градење.
Во оваа најнова истрага на Обвинителството, осомничени се вкупно 8 лица, меѓу кои има и бизнисмени од градежниот сектор.
Во август 2018 година, обвинителството донело Наредба за спроведување на истражна постапка против пет лица заради постоење на основано сомневање дека сториле кривично дело Злоупотреба на службена положба и овластување, во три постапки за јавни набавки. На почетокот на месецов, истрагата била проширена поради постоење на основано сомневање дека поранешниот градоначалник и уште две лица сториле по едно кривично дело Бесправно градење.
За истото кривично дело, Злоупотреба на службена положба и овластување е донесена Наредба за спроведување на истражна постапка против две лица кои во 2015 година, пречекорувајќи ги своите службени овластувања во име и за сметка на општината спровеле јавна набавка за обнова на цветен расад на жардињери (пролетно и есенско садење – 2015), што било во надлежност на Град Скопје, притоа постапувајќи спротивно на член 48 од Законот за јавни набавки.
„Во овој случај му овозможиле на правното лице имотна корист на име на јавна набавка во износ од 7.209.600,00 денари без ДДВ на штета на Буџетот на општината“, велат од обвинителството.
Во текот на 2016 година, искористувајќи ги своите службени овластувања, од обвинителството велат дека осомничениот донел Одлука за јавна набавка за изградба на Плоштад Пецо Божиновски Кочо на локација, каде што според ГУП на Град Скопје 2012-2020 е предвидена примарна сообраќајница.
„Постапувајќи спротивно на одредбите на Законот за јавни набавки и условите од Тендерската документација, му овозможиле на избраното правно лице – изведувач да се стекне со имотна корист од 20.970.000,00 денари без пресметан ДДВ на штета на Буџетот на општината“, соопштија од обвинителството.
Обвинителството донело и Наредба за за спроведување на истражна постапка против девет лица кои во периодот од 2011-2017 година ја злоупотребиле својата службена положба и овластување со преземање на дејствија што не смееле да ги преземат и со пречекорување на границите на своите службени овластувања постапиле спротивно на Законот за постапување со бесправно изградени објекти, при што на времени објекти им дозволиле вклопување во урбанистичко планската документација и нивно впишување во јавните книги за недвижности како легални објекти. Воедно, велат од обвинителството, овозможиле на правни и физички лица со постапка за отуѓување на градежно земјиште сопственост на РМ со непосредна спогодба на сопственици на објекти или посебни делови од објекти за кои е донесено решение за утврдување на правен статус на бесправен објект врз основа на кое се запишани во јавната книга на недвижности, незаконски да се стекнат со право на сопственост на објекти и ексклузивно право на откуп на земјиштето под објектот.
На тој начин, велат од обвинителството, било отуѓено градежно земјиште под објект во сопственост на РМ со површина од 1. 533 м2, како и градежно земјиште под и околу објект со површина од 722 м2.
„Во 2016 година овие земјишта како градежно неизградено земјиште имале вредност од најмалку 27.594.000,00 денари, односно 12.996.000,00 денари“, велат од обвинителството.
Заради непречено водење на постапката, против шест лица за кои постои основано сомневање дека ја злоупотребиле својата службена положба и овластување, надлежниот обвинител до Судијата на претходна постапка достави и предлог за определување на мерки на претпазливост и тоа забрана за напуштање на живеалиште, односно престојувалиште, обврска повремено да се јавуваат на определено службено лице или државен орган и привремено одземање на патна или друга исправа за преминување на државната граница односно забрана за нејзино издавање.
С. К. ДЕЛЕВСКА
