Четиринаесетмина руски морнари загинале откако избувнал пожар во подморница на голема длабочина, потврди министерството за одбрана на Русија. Трагедијата се случила во руските територијални води, при што морнарите се задушиле од отровни гасови.

Министерството не објави други детали за пловилото, ниту дали има преживеани, но руските медиуми објавија дека станува збор за подморница на нуклеарен погон, наменета за чувствителни мисии на големи океански длабочини.

Пожарот избувнал додека подморницата вршела истражувања на морското дно и во меѓувреме била превезена во арктичкото пристаниште Североморск, кадешто се наоѓа главната база на руската Северна флота.

„Избувна пожар и 14-мина морнари загинале од вдишување на чад. Причината за инцидентот се испитува“, кратко соопшти министерството за одбрана на Русија, не прецизирајќи колку луѓе имало во подморницата.