Пациентите со идиопатска пулмонална фиброза (ИБФ) од денес ќе добиваат терапија преку Програмата за ретки болести на Министерството за здравство. Од Здружението за поддршка на лица со ретки болести „Живот со предизвици“, велат дека овие за овие пациенти државата досега не обезбедуваше терапија.

Весна Алексовска, претседателка на „Живот со предизвици“, вели дека станува збор за болест на белите дробови која брзо прогресира и има лоша прогноза и дека за потребата да се обезбеди терапија за овие пациенти досега разговарале со тројца министри.

„Лани, Комисијата за ретки болести соодветно ги регистрираше овие пациенти во соработка со Клиниката за пулмологија и Министерството за здравство одобри набавка на терапијата со овогодинешниот тендер. Тоа значи дека овие пациенти конечно имаат терапија. Засега е обезбедена терапија за четворица пациенти. Годинава беа дијагностицирани тројца нови, за кои исто така се надеваме дека нема долго да чекаат да ја добијат терапијата“, вели Алексовска.

Министерството за здравство соопшти дека ова е еден од новите лекови кои се набавени со Програмата за ретки болести, за што преку оваа програма обезбедиле дополнителни 7 милиони денари.

„Лекот што го набавивме е прв избор за третман на идиопатска белодробна фиброза (ИБФ), ја стопира прогресијата на болеста и го подобрува квалитетот на живот. Ова е петти нов лек за пациентите со ретки болести набавен во последните две години“, велат од Министерство за здравство.

Е. БОЧВАРОСКА