Вилата Водно каде се наоѓа Кабинетот на претседателот Стево Пендаровски ќе биде отворена за посета од граѓани. Претседателот Пендаровски ќе ги пречекува граѓаните и ќе ги шета низ неговата канцеларија и останатите работни простории, за да може секој што сака да види каде шефот на државата ги извршува задачи.

„Кабинетот на Претседателот на Република Северна Македонија и вилата Водно се отворени за сите граѓани, како што беше и ветено во изборната кампања на Пендаровски. Секој што има желба, ќе има можност да ги види одблизу кабинетот, работните простории на Вилата и на сите вработени во Кабинетот на претседателот, салата каде што се организираат настани и прес-конференции. Отворениот кабинет ќе биде редовна пракса. Влезот во Вила Водно ќе биде слободен за сите најмалку 2 дена во месецот“, велат од Кабинетот на Претседателот.

Посетителите ќе имаат можност да дознаат факти за објектот, а исто така ќе може да учествуваат на настани од јавен карактер коишто се организираат во Вилата, како што е менувањето на државното знаме.

За посета на Кабинетот и на Вила Водно секој граѓанин може да се пријави пополнувајќи формулар, кој се наоѓа на сајтот на Претседателот. Потоа граѓаните ќе бидат исконтактирани од вработените во Кабинетот и информирани кога ќе биде организирана нивната посета и средба со Претседателот.

Од Кабинетот на Пендаровски велат дека покрај средбите во Вила Водно, Претседателот ќе има средби со граѓани и низ другите градови во земјава.

А. АНТЕВСКА